ALMIRANTEAREN ITZAL LUZEA

injustiziaren bat komentatuko genuen

beste bat

okendoren estatuaren ondotik pasatzerakoan

aspaldiko kontua da ikasleak ginen eta sentiberak

gazteak ginen ikasle baino lehen

injustiziaren bat komentatuko genuen

zer bestela

hemen eta edonon

halako amorruak hartu zuen laguna

ostikoz jo baitzuen hementxe uso bat

uso bat ostikoz

gazteak ginen eta sentiberak

poetak ginen gazte baino lehen

hamar metro urrunago jausi zen udal panpina

dantzari baldar

almirantearen itzal luzearen hobian

horixe akordura hemendik pasatzen naizen aldiro

aspaldiko kontua dela

gutiago amorratzen garela orain

injustiziak gero eta handiagoak diren arren

usoak adibidez, usoak munduko enparantzetan

usoak historia panpinatzen

eta orain poetek ez dakitela zer egin oinekin