ABEGI ONA

Nortasun-agiririk gabe jo nuen egoitza hartako atea,

zubipean lo egitetik esnatzean.

Ura neukan poltsikoetan,

zenbait itsas zorri itota ileetan.

Atea zabaldu zuenak galdetu zidan:

"Ba al dakizu nora etorri zaren, seguru?".

Besoak uztartu nituen; ez nion erantzun.

Karramarro ttiki bat atera zitzaidan

naufrago-ahotik, ustekabean.

"Sartu orduan", agindu zidan.

Pausoa eman eta bat,

arruntasunak jo zidan muturrekoa

eta, zorionaren zorionez,

pixa egin nuen aldean.