MEMORIA EZ GALTZEKO OHARRAK - 1

Ezin zaitzaket giltzapetu,

txolarrez eta eroz beteriko kalea zarelako.

Ezin zaitzaket ordenatu,

umeltasun lizunezko trumila zarelako.

Ezin zaitzaket harrapatu,

paturik gabeko zaldiaren galopa zarelako.

Ezin zaitzaket maitatu,

gogo oneko jendearen beldurren zakua zarelako.

Ezin zaitzaket pentsatu,

lo-gabezian ernai naukan ideia burugabea zarelako.

Ezagut zaitzaket, ordea:

neu lakoa zara, beste azal batekin.