MEMORIA EZ GALTZEKO OHARRAK - 5

Zurekin egin nuen amets

eta ibai epel batek kilimak egin zizkion etxeari.

Mamu-lana zenuen,

nire aurpegi gainera arnasa hartzera etorrita:

lotan soilik ikus zintzakedan.

Ametsetan egin nuen zurekin

eta emakume biluziak zeneuzkan inguruan,

makurtu eta altxatzen

eta muin egiten

bizkarrean, sexuan, eskuetan, besapeetan.

Irribarreka zeunden zu, denak maite baitzenituen.

Hain aspaldian ez dute gure begiek elkar ukitu

ezen nitaz oroituta, ametsetara baitzatozkit,

eta orduan

irristaka galduz doan harea bilakatzen natzaizu

loaren beroan.