POST MORTEM NIHIL EST

Amodioa zen, euria baino lehenago

                      bakardadea,

                      alosia,

                      julufria baino lehenago.

Eta heriotza ere.

Amodioa da, argidia baino lehenago

                  hitza,

                  arrabita,

                  hatsa baino lehenago.

Eta heriotza ere.

Amodioa dateke, kizkoria baino lehenago

                        isiltasuna,

                        sorbeltza,

                        balakua baino lehenago.

Eta heriotza ere.

Baina jagoitik, nahi ezpada ere, ez dirateke nehoiz,

zihaur baino lehenago.