Paradiso Radio

Ezagutzen duzue aho-soinua jotzen zuen itsuaren istorioa? —ahots sudurkari hark isilune luzeak egiten zituen esaldi batetik bestera—. Eskean ematen omen zituen egunak eliz atarian, harik eta norbaitek aho-soinu berri bat oparituko ziola esan eta aho-soinuaren ordez ganibet zorrotz bat ezpainetaratu zion arte...

        Eta gure ezpainak ere, ez ote dira, antzinako borroka bateko zauri, zauri gorri, zauri bikoitz...

        Kontsola zaitezte: ziur badagoela beste nonbait, beste ezpain bikiren bat zuengan jarrita dauzkana bere pentsamenduak. Nik adibidez... zugan... bi sahats badira munduan, gure lorategian dago elkartuko dituen hamaka... Goizeko bostetarako hamalau minutu doi falta diren honetan, laztan bat bidaltzen dizuet kariñoa zer den ahantz ez dezazuen. Eta muxu bat ere bai. Hortxe. Gehien maite duzuen zauri bikoitz gorri horretantxe. Gogoratu 22.2, hiru zisneen irratia dela hau, Paradiso Irratia.

        Susana Qrekin hitz egin dezakezue hala nahi izanez gero. Gogoan izan gure lorategira sartzeko kutxa blindatuaren konbinazioak: 31269 eta 42344. Amodiorik bada gure parkean, hemen, Paradiso Irratian, zu entzuteko gaude... Smithers anderearen lorategian noski, non bestela.

                Charlie inoiz baino hobeto ari da jotzen

                mutikoa ezkutatu da billar mahaiaren azpian

                (mutikoak badaki zer egin, badaki zer egin)

                eta Smithers andereak ezin du lorik egin

                o, ez, Smithers andereak ezin du begirik bildu

                kontrabaxuak behin eta berriro dio:

                zenbat tren leihoan insomnio guztiak dastatzeko ere

                Zer den jazza erranen dizut:

                betikoa whiskya den hiztegi bat, den hiztegi bat...

                Billar mahaiaren gainean larrutan ari diren

                bi emakume,

                disimuluan non dago takoa? galdetzen duen agure zelatia

                konturatu orduko oinen azpialdeetatik

                gorputzaren barrua zeharkatuz bortizki

                bururaino igotzen den begirada bertikal

                tren abiadurako bat

                begi elektrikoz betetako zoru batean oinez ibiltzea

                oinez ibiltzea hogei zentimetro zoruaren gainetik

                zure buruan zaldi karrerak egiten direla sentitu

                apustu egin eta zerbait irabazi edo dena galdu

                funerariako kotxe beltz bat baino beltzagoa den

                bakelitazko telefono baten ondoan zain egon

                (zure deiaren zain, ulertzen duzu)

                O Mrs. Smithers' flowers, Mrs. Smithers' poor flowers

        Gure sintonia eten beharrean gaude: berrien txanda da orain. Atzo, agentzien arabera, Marcos Vicente Machado, hogei urteko gazteak bere buruaz beste egin zuen Brasilgo erdigunean dagoen Goianian. Hil aurretik idatzitako gutun batean adierazi zuenez, bere asmoa, Mamonas Assassinas, joan den larunbatean Brasiliatik Sao Paulora zihoazela hegazkin istripuz hilik suertatu ziren rock taldeko kideekin bat egitekoa zen. «Mamonas taldekoekin eta Edsonekin (bere lehengusu berriki hilaren izena zen Edson) elkartzera joan naiz. Ez negarrik egin. Elyne eta Kellen maite ditut», idatzi zuen Marcos Vicente Machadok aizto elektriko batekin bere buruaz beste egin aurretik.

        Bitxikeria bezala erantsi, igarkizunetan trebe den astronomo batek rock talde honetako kideek hegazkin istripua izanen zutela aurreikusi zuela, eta halaber aurreikusi duela Brasilgo presidentearen hegazkin istripu molde bertsuko bat gerta daitekeela ondorengo egunetan. Fernando Henrique Cardoso, Brasilgo presidenteak, ez du, ordea, igarkizuna aintzakotzat hartu eta 1958an eraikitako bere aireplanoan bidaiatuz jarraituko duela adierazi du.