inor gabeko egunak

agudo idatzitako mezu ñimiñoak

behatz artean zimurtuak:

ederra zen atxaparra

gora zihoanean etxe ahaztuaren gauean

harri zehatzak hautsaldi lurrinduak

ipurtargiak lo buztinaren malguan

intsektu hezur hortzez estalitako hareak

eta gau nekatuen abiapuntuko ibaia

loratze argitsuak ilargi mikatzak erroizten

lurrezko artesiak kostako hiriak txoriak

bide hauskorrak hegada betean aurkituak

ametsezko argialdi izugarrian

gelditzen zaizkit kristalezko igarobideak

non laztandu baititzaket gorpuzki ikaztuak

irekitzen dut aurpegiaren sarbideko atea

patioko eskailera goroldiotsuan behera noa

zeharkatzen dut harrizko loredia

han bizi izan naiz amildu aurreko denbora guzian