Polizia detektibe Interpoleko agente sekretuok

Polizia, detektibe pribatu, interpoleko

                            agente sekretuok,

zeregin larria proposatu nahi dizuet:

                        ene neskalaguna bilatzea.

Ene mapamundia zen, strip-tease egiten zuen

                                  enetzat bakarrik,

ene begiradakin jantzita joan da

                                      ez dakit nora.

Gustatzen zaidan neska galdu zait

                      toboganetara jolasten,

ametsaren ertzetik irristatuta erori da

                                kanpora.

Gabeziekin eta egunsenti alargunekin utzi nau

                                    iheslari horrek.

Ez al dabil munduaren gainean hegatsez

                        modazko kanta bat bezala?

Ez dakit zer dela eta ez den itzuli,

                    kaleak zentzuz aldatuko ziren,

edo lurrikararen bat itzultzeko orduan:

                                Bila ezazue.

Errekista itzazue artxiboan golko ilunak,

                  identifika ezazue jendea,

bila ezazue bazter auzoetako trenetan

                      eta egoitza alokatuetan,

inguratu, harrapatu eta ez iezaiozue

                                  aldegiten utzi.

Bila ezazue euripeetan, altza ezazue

                            bulegoko alfonbra,

galbahetu itsasbazterreko harea,

                    iker itzazue zoologikoak.

Egizue frantsesek egiten dutena:

Cherchez la femme!

Abiatzean ez zuen lorratzik utzi baina

        ezagugarri batzu azalduko dizkizuet:

eguzkiaren aldean sortu zen eta argiak

                  mendetan pindaturiko kolorea du.

Orein sortu beharrean, andereen bi diti

                        eta bi izterrekin sortu zen,

eta halaere oreinaren begirada

                              garden galduarekin.

Larruaren kolorea eta begiena aski ez bada

                      beste xehetasun batzu:

eguzkien argia, lainoen hezea eta munduko

                    ezpainik ederrenak ditu.

Ene lagun zein etsaiok, esaiozue datorrela

                  bere musikarekin honuntz,

harrokeria guziak erantzi ditudala, iada

                      filosofiarik ere ez dudala.

Kalean ustekabean ikusiko duzuenok

                        esaiozue non bizi naizen,

datorrela ene alboan lo egitera

                                eta esnatzera.

Behin batean, laztandu nuelarik, haztarna

                      digitalak ohostu zizkidan.

Terrorista kaltegabeak taigabe oldartzen dituzuen

                          estatuen seguritate indarrok,

bila ezazue neskato hori, ni ni gabe utzi ninduen,

                              munduaren ertzik goxoena da,

ez dakizue biluzten denean ze arriskua den

                                        humanitatearentzat!

w1995