Amsterdameko oroitzapen bat

                Là, tout n'est qu'orde et beauté,

                luxe, calme et volupté

Baudelaire, L'Invitation au voyage

Atzerri hontan nola ez laite

ene gogoa enoa?

Nepenthes ordez beharrik badut

jaunen garagar arnoa:

jasan ahala hurrupaturik

Paristik urrun banoa.

Lainoak oro mozkor horailak

barreiaturik ni baitan

barneko soaz berriz dakusat

sekul' ahantzi ez zaitan

Amstel-ondoko hiri maitea

zeinen lilura derraitan.

Amsterdameko kaletan gaindi

berriz narama oroitzak

etxe naroak ikusten ditut

botz isilaren egoitzak;

beta litzake arima batek,

han, bere aiho bakoitzak

Itsasontziek, lur guztiaren

egin ondoren inguru

zekarten portu Iparrekorat

Sortaldearen leinuru

urbidetako ura, ordea,

berde zen, eta ekuru.

Baldin parketan bazen atseden

lore goiztarren artean,

lantegi eta bankuetarat

jende ariok joaitean

zuten antz zintzo 'ta zentzatua,

kalvindarrena zatean...

Kalvinismurik ote zen aldiz

nengienean paseiu

«karrika bero» hersietarik,

ostatu eta bar teiu

hetan maitarzun ez-ohituek

bazutelarik entseiu...?

Utzirik gibel eme bero 'ta

gizon mozkorren multzoak,

Nindabilano parketan, hurran

haur goiz-loratu gozoak,

ene zentzuak oi! ez ziraden

kalvindar eta zintzoak...

Lore heietan, Bessie, gaur zutzaz

bertzerik oroit duta nik?

Ez... zu bakarrik, irriño batez

ene altzoan etzanik,

blue-jean gorritan gorputxo bera

fereku-gose jadanik...

Guztia balitz ere gezur bat

garagar arnoz sortua,

zure oroitzak daut populkatzen

gaur Pariseko mortua,

amets duela nire bihotzak

Amsterdameko portua

Zuri eskerrak, Amsterdam (edo

jainko-edari onari)

esperantza bat bihotzondoan

atea joka zait ari:

erdiz jostaka, benetan erdiz,

bainan eztiki kantari!

Esperantza bat oraino denik

ur berdearen kolore

edo haur-eme baten soaren...

ukan dezala ondore

nik baratzetan, behin, hartzara

biltzeko zenbait goiz-lore...!

Iparraldeko Amsterdam hori,

zor derauzkizut eskerrak

utzi dautazun amets-ondoko

esperantza so ederrak

dauzkidalakotz are zohartzen

gaur Pariseko bazterrak

w1959