Zerbaitetan irabaztun izanen gara

Entzuidazu, zaila dago karea bilatzen

Gauza asko daramagu gordean garbitu ezin direnak asko

Salbokonduktoa zuten maitasuna poeta kaskarrek

Lehia garmindu bat bitartekotza errimea

—Zain bakoitza bere tokian lau zuloak zabal—

Eta ezagutzen zaituena urrun duzu orain

Mintza zakizkio negumineko laharraz galdutako lagunez

Sufrimendu guztiak ez direla hautazkoak

Heldutasun guztiak ez direla behartuak

Koordenada soka berean dagoz Le Muret eta Lugo

Besteren ohar-koadernoei ostutakoak dira gure enkontruak

Ez da ez gure algebrarik ez gure lainorik haizearen oinetara

Beti elkar despeditzen ari den jendea omen gara

Bere etsia non sarturik ez duen begirada

Zuk zer diozu mendiak tarteko maitatze honetaz

Zer galdua badaukagun seinale jo duzu inoiz

Sentimenduak desabitatzen dihardugu indarrean ez diren mapak bezala

Itunetako eranskinetatik eta agindu zaharminduetatik aldegiten

Gurkera tajutzen du nire memoriak orube urasetu baten aurrean

Aurki ilunduko du, sartuitzazu geranioak

Orduan ezin ikusiko dugu elkar

—Karez zuritu gabeko idazkiak paretak—

Eta herrien izena ahoskatzeko moduagatik maiteko zaitut

Harresi bat izan daiteke maitasunari emandako izen bakoitza

Eta alde bi ditu egunak bezala bihotzak bezala bi alde

Berdin da oinpean zubiek behera egiten badute

Etxekoen argazkiei su ematen badiegu hotza kentzeko

Banator, hesolen errenkadatik destatzen diot iluntasunari

Berriz ere zu zaitut ments

Eta ez dakit zer dagoen defenditzea deliberatu genuen bakardade mendre honen atzean

Lugo eta Le Muret soka batean