Goian izarrek bizitza zuri,

aztoreak mendian harkaitzezko.

Gizonak, aldiz, munduan

bizitza gizonezko.

Hain da gizona gizon...

2

Egia!

Zer ote dugu Egia

ta haren argia?

Behin hurbildu gintzaizkion

Egiaren zokoari,

leize ilun ta beltzari.

Han behean omen dago

Egiaren presondegi.

Beltzeriaz izurrituak

ginan geldi.

Kristo, nire Jesukristo,

gaitz sendaezin hau

ahaztu diguzuna:

Pilatoren galderari,

gizadi larriaren

itaun heriozko gartsuari

zenion erantzun

burua makurtuaz tristeki.

Ihardespen zail, ihardespen izkutu

zenigun ihardetsi.

Eguzki galda errean

bare zikina etzanda dago

infernurako bidean.

Bidean jaio zuten gaixoa

(ez nondiko eta ez norako)

ez baida berez jaioa.

Gure antzinakoek

ez digute erakutsia

Jaungoikoaren aurpegia.

Gure barnean

axanparen mailu burnia

dugunean kolpeka

jaso ditugu begiak

ta gogoaren antsia

Jainkoaren begira.

Itzala dugu ikusi

haizearen uhinetan balantzaka,

Jainkoaren itzala,

eta menturaz Haren sorbalda

gure saminen itsasoan

uhin artean ihesi...

Gu guztion deia,

kaio nekatu,

itsasoa gaindi dabil

oinak non jarri ezinik,

otoitz madarikatu.

Ez du jaten ilargirik

zapoak potzuan,

dagoenean kantari

gau barruan.