UXARKA

begi mintzen ostean

hitzen azpilduretan

hodeien kristal artean uxarka nabil

hortzordeak edontzian

ito dituztenen estatistikak

asaldagarri gerta daitezke

zeure onkeriazko talaiatik

jendearen loari ostu badiozu

amesgaiztoen aukera

usu ernatzen da

eulien pausaldien karietara

oldozpenen bat:

zeri diozun benetan herra

euliei oro har edo eulien ekanduei

ala euli jakin batzuen sabel-dantza da

gabezien andel

gaitzen adimenduak

inor asko ekintzara ez eramanda ere

pertsonek ausarki hil behar dute

sistemak iraun dezan

sasoiko eta beti-gazte

nork egin nahi luke tesi bat

bortxaz hildakoen eskuko marren

irakurketa kritikoaz

eskatzeko gero

kirol olinpikoen zerrendan

sar dezaten kiromantzia

gauza txikien muinean uxarrean nabil

osasun hesia ezarri nahirik

ergeltasun hedakorra

ez dezadan haboro zabal:

bihotz bakartuak dira

pertsonak egiten dituena herri