Gu gabe ere
Gu gabe ere
2021, poesia
96 orrialde
978-84-17051-79-2
Azaleko irudia: Nagore Legarreta
Itziar Ugarte Irizar
1995, Oņati
 
 

 

INTXAURRAK ZURITZEN

 

 

Sukaldearen barrenean egoten zen

kolorea galdutako amantala soinean

hankak zabalik, izterren artean

plastikozko balde urdin bat hartuta

 

denbora egin zezakeen artoa irakurtzen

oiloak elikatzeko gero

 

ez musikarik ez irratirik ez telebistarik

aldizkari arrosa iraungiak inguruan.

 

Badakizu?

Zure zorion sumindua

horixe maite nizun gehien

lurrez betetako etxeko zapatilak

labanen dantza eskuetan eta

gauza ederrekiko sortasuna

 

—loreak bildu arren egunkari orrietan—

 

esaten zenuenean

umea egin zonan kaka egin zonan

 

nola behatzen zenituen gaizto

gure gorputzak emakumetzen.

 

Kolonbiarren fruta-dendan etorri zait, aspaldikoz

intxaur osoak erosi eta etxera joan naizenean

zuk jakin gabe baina zure irrikan

aulki bat hartu, mahaian bi plater zabaldu

eta musika irrati telebistarik gabe aritu guran

 

—aurrean zaitudala gozo marmarka—

 

pentsatzen nola izango den zurekin egotea

berrogei ditudanean, hirurogei…