Igeri ikas balezate

Nigan alkoholak itotako pizti guztiek

igeri ikas balezate

eta eldarnio aldietan neuregana itzuli!

        Mundu harrigarria osa nezake

muga berotsu labankorretan bizitzen

zoramenari aurpegian bertan hatsa botaka

berarengandik ezin hurbilago

edozein mementutan beraren hatzaparrez

eutsi eta besarkatzeko moduan

        Agian haginkatu egin nintzakete

samako zainetan edo

        Urtu egin ninteke odoletan

eta igeri egiten ikasitako piztiok

aterpeak zuloak habiak gordelekuak

paratu litzazkete nire gorpuan.

        Zirkoa bihurtuta

neu ninteke pista eta ikusle

                    pizti eta hezle

        sarrera aulki eta ume

Pailasoaldietan barre egin niezaioke

neure buruari,

        eta zoroetxera eraman nintzakete

ez alkohola edateagatik

ez zirkoa eramateagatik

ez aulki eta ume izateagatik

ez muga berotsu labankorretakoengandik

ez neure buruari barre egiteagatik

ez    ez    eta ez.

                Barre egite soilagatik

eraman        nintzateke

zeri barre egin niezaiokeen

kontuan hartu barik

                  Barre egite soilagatik

nigan alkoholak itotakoek

igeri egiten ikas balezate.