EKANDUEN MUDA

larrialdietara deitzen denean

nor azalduko den ez daki inork:

zenbat organo pozoitu

zenbat bakarrizketa koral

itxialdi ekumeniko honetan

ebaska mikrotragedia bati begi eman

nahi gabe abian jarriz beste hamaika,

aterpea leihoa balkoia izan edo ez izan

eta agorafobiari zelan aurre egin

youtuberrei ikasita

buruak diost horrela ezin dela

bihotzak ezetz ezetz gibelak

duela gutxi arte beste batzuk ginela,

formol potoetan dabiltza igeri egun

oroitzapenen azalera igo nahi dutenak

izan edo ez izan

izan eta ez izan

etsaiak hiltzen zituztenak

errugabetu egiten genituen batzuetan

herria geu ginela uste genuenean

etxeko mamuak isiltzeko

ez da aski ispiluak ehunez estaltzea

orain bestelakoa da irudirik gabeko loa,

ez dago jakiterik nor etorriko den

larrialdietara deitzen denean