TATUAJEA

Orain, esaten dut,

bizitzak lilurak erantzi dizkidala

Ez dudala ez jainkorik,

ez printzerik,

ez gudaririk,

ez amatasunik

paparrean

Baizik eta bakardade bat aldamenean,

neuretasun bat bidearen azken mugan

Baina esaten ez dudan arren

jakin badakit

besteren itzal izateko desira hor dudala,

jainkotzearen txutea ordezkatzeko metadona,

orratz goriz tatuatuta,

behazunean