Spray
Spray
2011, poesia
96 orrialde
978-84-92468-27-0
azala: Lander Garro
Paddy Rekalde
1964, Deustua
 
2006, nobela
2004, poesia
 

 

ZERUTIK IZUA

 

euria gogotik ari badu ere

larru iluneko ume bi zerura begira jarri dira,

teilatuek mugatzen duten laino beltzetara,

zaparrada honek bustitzen dizkien eskutxoetatik

oraindik are estuago heldu diote elkarri,

eta horretan gelditu dira

ekialde hurbil baina orain urrun hartatik etorritako

larru zein patu iluneko ume biak

 

inguruko jendea hara eta hona dabil,

nor bere beharretara, bere zereginetara

eguneroko bizimodu gor eta itsuaz,

ume biek espaloi erdian sortu duten traba saihestuz

 

umeek zerurantz begira jasotzen dute euriaren kolpea,

bustitzen ari direla axola gabe,

uholde bihurtu diren lainoen gainetik

helikoptero baten zaratak erabat geldiaraziak

 

espaloiaz bestaldeko atari batean babestuta

agure batek bere burua ikusten du

ume horien begirada beldurtuetan,

sua eta izua darizkien begi txiki horietan,

eta, atzera biltzen diren filmetan bezala,

umea zeneko garaietara joan zaio bihotza,

zerutik bonbak etengabe jausi

eta inguruan lehertzen ziren egunetara

 

kalea gurutzatzen ari dela

aspaldian ez bezala hasi zaizkio atzamarrak dardarka,

poltsikoan mendazko karameluen bila dabiltzan

atzamar zimurtuak