MAPA BAT

hitzek ez dute balio zure

samina neurtzeko eta

hala ere

odolaren bazterrean

                idatziko

                duzu

torturaren itxaron gelan

zaudela gogoa akiturik

bizitzatik egotzia izerdi

putzu batean ito beharrean

                idatziko

                duzu

hortzei falta zaien zentzua

topatu nahian

bidea egingo duzu oroitzapenak

belaunetatik ezabatuz

paperean jasotako mundua

kutxa txikietan ehortziz

ihesaldian

historiak oroitzen ez dituen

istorioak bilduko dituzu

gizatasunaren hatsari nolabait

bada ere

eutsi nahian

bizkar baten bero ahantzia

denborarentzat

izozteko asmoz

mapa bat osatuko duzu

gero

noizbait

norbaitek

kutxa txikiak jaso eta

itzulerako bidea egiteko

aukera izan dezan

zuk ordurako zure

liburuen moduan egina

izango duzu

lurperako bidaia

idazlea zinen

gerra baino lehen

gosea baino lehen

isiltasuna baino lehen

eta ez du inork jakingo

eta ez du inork

mapa erabiltzerik izango