HUNTZA

Mahai gainera eroritako ardoa legez loa,

eta ametsetan sortzen ditudan Brazilia horiek,

epe baterako lore gozoak.

Gerizperik gabeko ardoa legez loa,

ametsera dakart, edo dator,

edo ni naiz noana.

Iratzarriko naiz,

ohean ez da ardorik egongo dariola,

urkia zuria izango da berriro ardoarena,

musuarena, haizearena bezala.

Lotan egon diren haziek besoak zabalduko dituzte

prestatzen ari diren gezur geldoa

tenkatu ahal izateko saihetsaren bila.

Opatu egingo diet.

Baietz esango diet.

Norbaitek bultzatu ezik bizitzak ez du dardararik egiten,

ezin dugu beti arotza eta egurra izan aldi berean.