GAUZA KONKRETUAK

Sukaldean jarrita nago, makarroiak egosi bitartean.

Gauza konkretuak maite ditut

eta horien izenak errepasatzea gosaldu baino lehen:

iratzargailua, euria kalean, supermerkatua,

musuak siestan,

ardo bat, koadrila,

semearen esku ttipiak,

jendea plazan,

zu...

Kilima gozo-gozoak egiten dizkidate,

dieta ostean oturuntzak egiten dituenaren antzekoak.

Ezinezkoa zait eguneroko gauza horietatik aldentzea:

boligrafoetara itsatsi zaizkit eta ez dakit astintzen.

Dena den,

gauza konkretuek ez dute luzapenik onartzen:

makarroiak egosita daude dagoeneko.

Bizimodua honelakoxea da.

Poema baten germena hozitzen hasten denerako,

badator egunerokotasuna sakaka.

Eta mahaitik jaiki beharra,

ernegu lirdingatsu baten menpe.