Adiskideen hitzek galdu dute herri hau,

lukurreriaren eta berekoikeriaren ele traidoreek,

oraindik orain satelite bidez unea ez dela eta

oker gabiltzala dioskuten diskurtso salduek

lurraren muineraino iltzatu zituzten kaleetako arantzei

zelofana aldatu eta txapela ipini diete.

Baina ezer gutxi egin dute

puntaren arriskua zorrozteaz gain

mila mozorro eta maskara fabrikatu dituzte

euren buruak ispiluaren aurrean ezagutu ezinik

mihi pozoitsua daukate,

ipurdi arrotzen zaporeak emana.

Hitza zokorarazi digute,

hemen odol asko eta su gehiagoz

eraikitzen da askatasun bidezidorra

baztertu bada mintzoa

eta mila koloretako uniforme kiskalietan

gorde izar argitsuenentzat keinu konplize bat.

Oinazeak egin izan du lur honetan bidea

baina oinaze ezkutu lar dago hemen

derroten umiliaziora ohitu gara

eta apurrik apur goaz

makulu erdaldunen gainean makurturik.

Samin handiak datoz oraindik

zertarako hortaz banan-banan itxaron?

Profita gaitezen arma trafikoaz,

egin dezagun abordajea gasolineretan;

borroka galduetatik gatoz eta

traidoreen gezurrezko bakea baino ez dugu ezagutu.