Biografia

 

 

Jon Gerediaga Goitia (Bilbo, 1975)

 

      Antzerkigintzari dagokionez, Bilboko FTI-Antzerkiola Imaginarioa-n ibili zen dramagile lanetan. Huts Teatro, Artedrama edo Khea Ziater bezalako taldeekin ere egin izan du lan. Hainbat antzezlanen gidoian hartu du parte, bakarka zein elkarlanean: 8 Olivetti poetiko (Hiru, 2001; Artezblai, 2007); Mundopolski (Artezblai, 2007); Yuri Sam. Otoitza (Artezblai, 2007); La niña que sueña lunas; Kaputen kanta; Au revoir, triunfadoreak! (Artezblai, 2007); Babiloniako loreak (Antzerkiola Imaginarioa) edo Etxekoak (Huts Teatro).

      Poesia da agian gehien landu duen alorra: Fitola balba, karpuki tui (2004), Jainkoa harrapatzeko tranpa (2007); Zentauro-hankak (2011); Argia, lurra, zuhaitza, zerua (2015); Urtaroak eta zeinuak (2019) eta Natura berriak (2020), guztiak Pamiela argitaletxearekin. Itzulpengintzan ere, besteak beste, Hölderlin, Södergran, Shakespeare, Pessoa, Ungaretti edota Li Bai bezalako poeten zenbait lan euskaratu ditu.

      Antropologian doktorea da, 2010ean maputxeen espiritualtasunari buruzko tesia defendatu ostean (Drama y símbolo en la espiritualidad mapuche). 2003. urteaz geroztik filosofia irakasle da Lauro ikastolan.