Sar-hitza

ehaze

      Panpina antzezlana Erika Olaizolaren imajinariotik, bulkadatik, adierazteko beharretik sortutako lan bat da. Baina, horrekin batera, emaitza kolektiboa ere bada. Hala oholtzan, nola liburuan. Ez kasualitatez, egileak lantalde bat osatu zuen sorkuntza prozesuari begira, Leire Arenas eta Oier Guillanekin hasiera batean, Idoia Beratarbide eta Javier Barandiaranekin ondoren, bere sen horri forma emateko. Antzerkian hain ohikoa den joera kolektibo horrekin fidel, liburu honetan ere bide hori hartu du: batetik, irakurleak Panpina antzezlaneko edukiez gain Erika Olaizolak berak sormen prozesuari buruz idatzitako gogoetak topatuko ditu, eta bestetik, han edo hemen bidaide izan dituen lagunen idatziak jaso ditu, “panpina” kontzeptua buruan hartuta libururako beren ekarpenak egin dituztenak.

      Antzerkizale garenok Erika Olaizola oholtzan duela ez hainbeste ezagutu genuen arren, dagoeneko ibilbide luzea egindakoa da: batez ere aktore ikusi dugu, hasiera batean Azpeitiko emakumeen antzerki talde amateurraren orbitan, Ane Arenas lagunarekin piezak eginez ondoren; publikoaren zati zabal batek Francoren bilobari gutuna lanean deskubritu zuen, edo Xake Produkzioak taldearen Lur antzezlanean. Horrez gain, pantailan ere ikusi ahal izan dugu, Oreina filmean kasu, Zulo sorkuntza propioko laburmetraian, edo Kartzela websaila bezalako proiektuetan. Aktore izateaz gain, gidoilari ere badugu, zuzendari, eta liburu honekin gero eta gehiago, idazle. Esanguratsua da, zentzu horretan, Amancay Gaztañaga eta Miren Gaztañagarekin batera sortu duen Kamikaz kolektiboaren baitan egindako lana, bere fazeta askotarikoak erabiltzera bultzatu duena: Käffka lanean, kasu, zuzendari, aktore eta gidoilari ibili zen, Euli-giron berriz aktore sortzaile, beti ere kolektiboak erakutsi ohi duen arriskuarekiko eta ahots propioen bilaketarekiko leial. Eta ildo horretan, Panpina, funtsean bakarlana izanik ere, Kamikaz kolektiboaren jardunaren baitan kokatu du.

      2019ko udazkenean estreinatu zenetik, Panpina antzezlana emanalditik emanaldira hazten joan da. Publikoarekin berehalakoa izan da konexioa eta, gerora, Erika emanaldiz emanaldi antzezlanaren energiaz jabetu ahala, gero eta ozenago egin du eztanda haren oholtza gaineko indarrak. Liburu hau argitaratzeko unean plaza ugari ari da ezagutzen Panpina; pandemiak denbora batez ibilbidea eten badio ere, erraztasunez ekin dio berriz ere plazak betetzeari. Emanaldietara joaten denak berehala sumatuko du publikoarekiko konplizitatea, Erika Rooibos pertsonaia protagonistaren emakume gorputz auto-ironikotik bidaltzen dituen jendarte-zirtoekin aukera izango du barre egiteko, hausnartzeko, eta hunkitzeko.

      Indar handia behar da oholtza bat bakarka ordubetez betetzeko, eta Erika Olaizolak soberan du indar hori. Liburu honetarako idatzi dituen lerroetan berehala sumatuko du irakurleak gaitasun hori bera.