Mona Lisa

Pizkundeko lorea! zure irribarrean

bizi ta heriotzaren ezkutuak dagoz;

izan eta izangoaren bulkoak badatoz

batez nire gogora zu ikustatzean.

Betiko emea zara, Bizitza-iturburu,

ametsetako aingeru, atsegin-ekarle;

begiotan, ordea, agertzen duzu ere

bihotza pilpil jartzen didan halako izu.

Sorgina! Leonardok zu sorraraztean

Lukreziren edenaz eta Beatrizen

jainkozko ikuskariaz amets egiten zun;

ta aurrez zerua eukita, lezea inguruan,

goiz-argi txiunta zale ta gau-iluntasun

isila, zure irudi hortan, zitun batzen.

        Caracas, 1961eko otsaila