BIGARREN GUTUNA
BITORIANO GANDIAGARI

           Urbiatik jaistean

Zuk ere goretsi zenituen txoriak

Entzuten ditut:

Zuhaitzen itzaletik nabil

Eta elorriak loretan ikustean

           Esker onezko salmoak

Kantatzear nago.

           Urbiatik jaistean

Ongi sentitzen naiz, pagoen maldan

Soseguan bezala,

Arriskutik kanpo, elorri artean

Etzateko gogoz:

           Esker onezko salmoak

Kantatzear nago.

           Urbiatik jaistean

Goribar baserriko alabaren soa

Gurutzatzen dut.

Errotik beretik bizitza

Etengabeko ihardukia dela

Sumatzen du elorriak:

           Esker onezko salmoak

Kantatzear nago.

           Urbiatik jaistean

Lantzurdak eta hodei eskuzabalek

Harrapatzen naute

Eta elorri sasitzarretan aterpea

Bilatzen dudanean

           Esker onezko salmoak

Kantatzear nago.

           Urbiatik jaistean

Munduz eta bakartasunez

Hanturik nator irri xoxo batekin.

Opari-dendan Elorri erosi dut

Eta bi eguzki-lore itxurako brotxa

Bilobentzat, zorte on ametsez:

           Esker onezko salmoak

Kantatzear nago.

           Urbiatik jaistean

Basilikan sartzen naiz isilik

Elorri emankorra eskertzeko.

Arantzazuko amari ene dei mutua

Luzatu orduko fraidea ondora

Etortzen zait: ixten dugu...