Kontatuko dizuet nire historia,

munduko itsaslapurrik zitalarena,

besteei ondasunak lapurtzen zizkiena

harik eta bere duintasun guztia

ebatsi zioten arte.

Ez zen printzesa bat izan,

errege boteretsu baten alaba,

arotz xume baten iloba baizik.

Berak esan zidan

Mediterraneoko itsasoaz landara

bazeudela lur emankorragoak;

berak erakutsiko zizkidala

merkatari aberatsen etxeak zeintzuk ziren.

Eta nik sinetsi egin nion.

Sinetsi egin nion

bere begien berdetasuna bezalakorik

inoiz ez nuelako ikusi,

bere jenio biziak

beste aukerarik ez zidalako ematen.

Nirekin etorri eta

ezer gabe utzi ninduen

itsaso bizi batek bustitako esparruan

ezer gabe ez nintzela ezer esanez.