MENDI-GAINA

 

Maite ditut gailurrak

argiak ez beste...

Ai, hegaztia banintz

gainik gain nenbilke!

 

        * * *

 

     Oi, udaberri goizez

mendiaren gailurra!...

Oi, haren ametsezko

zorakortasuna!...

Zein ezkutuzko indarrez,

zein atseden egarriz,

zein gorago-joranez

narakark higana?...

 

     Egiz, maitagarriak

dituk hire basotan?...

Egiz duk arnasgai bat

ezilkortzen duna?...

Egiz, eguzkiaren

lehendabiziko muinaz

sortzen duk zorunaren

lore ezezaguna?...

 

     Nik hamestan^[1] bezala

ote haiz, mendi-gaina?

Goi-jauregiko maila?

Gotzonen hurbilgo?...

Egiz, Jaungoikoaren

esku ta handitasuna

ote dituk hor goitik

sumatzen bertago?...

 

     Hire goi urdinaren

urre lainotsupean

beheko txikerkerion

ahazgaia balego,

arren, aixkide urruna,

otoi, mendi maitea,

negar-haran beltz honi

kendu nazakiok!

 

        * * *

 

     Maite ditut gailurrak

argiak ez beste...

Ai, hegaztia banintz,

gainik gain nenbilke!

 

1920

 

 

[1] amesten haudan