IRAUNGITZE DATA

Limoi erdi bat,

kadukatutako bi jogurt,

albertxiko marmelada

eta perrexila

baino ez zara;

monotoniaren alegoria

higuingarria.

Souvenir baldarrak azalean;

Paris, Erroma, Budapest, Berlingo

oroitzapen higatuen erakusketa

wifiaren pasahitzari,

erosi beharrekoen zerrendari

eta ahaztu ezinezko ohar hiper garrantzitsuei

eusten.

Ahanztura betiereko baten

aurkako matxinada

urdina.

Behin eta berriz zabaltzen zaitut, ordea.

Barrua ikusteak zu betetzea eragingo duelakoan.

Behin eta berriz ixten zaitut, orduan.

Aurrez zabaldu zaitudala,

ez da zio sakonagorik behar

ixteko.

Zurekin ari naiz.