Lazunak azkazaletan
Lazunak azkazaletan
2021, poesia
104 orrialde
978-84-17051-66-2
Azaleko irudia: Malen Amenabar
Oihana Arana
2001, Eskoriatza
 
 

 

ZABALDU ETA JAN

 

 

Frutak jatearekin

gertatzen den gauza bera

gertatzen omen da

liburuak irakurtzearekin.

 

Etxean zer egin ez dakizunean

ez ei da laranja jaten.

Txokolatea jaten da.

 

Etxean zer egin ez dakizunean

ez ei da liburua zabaltzen.

Denborari oparitzen zaio denbora.

 

Beti denbora faltan,

baina erloju geldiei

so; erredundanteegia da

akronotasuna.

 

Ezin jakin hamaikak eta

hogeita zazpi diren,

 

erloju hautsi batek ere

ordua ondo markatzen baitu

egunean bi bider.

 

Ni ere hala bizi nintzen

norbaitek mesanotxera

liburuak

eta ohera

laranja zukua

ekarri zizkidan arte.

 

Orain liburuak jaten ditut

eta laranjak zabaldu;

 

erlojuei ez diet

pilarik aldatu.