Arrotz eta eder
Arrotz eta eder
2016, poesia
136 orrialde
978-84-92468-85-0
azala: Xabi Erratzu
Pako Aristi
1963, Urrestilla
 
2014, poesia
2003, poesia
2001, poesia
 

 

TXANPONAREN ALDEAK

 

 

Zein dontsua den

amodioaren saminaz idaztea

maitea ondoko gelan

nobela bat irakurtzen

daukazunean.

 

Zein sentikor kazetaria

etorkin ito berrien harira

—67 ume tartean—

Jarraituko dugu gure

afari festa honekin halere!

idatzita afaltzera

esertzen denean

—hark sukaldean du maitea—.

 

Gosetiak ditugu mintzagai

bigarren platera ekarri bitartean.

Turismo masifikatua

hondartza mukuruetatik itzuleran.

Ahantzi dugu Kutxazaineko lotia

etxeko atea ireki orduko.

Errukitsu baikara, hara salbamena,

ondasunik arriskatu gabe.

 

Ez garen hura ulerkor zaigu,

haren lekuan bageundeke

gogaikarri litzaigukeena.

Hurkoaren arazorik ez dugunean

elkartasun oparoa dugu opari.

Kausa on guztiak urrun,

hurbil zaizkigunean, uzkur:

Nork nahi lituzke zortzi,

8! etorkin beltz bizilagun?

 

Astindurik ez, ordea,

gure kirio izoztuen sinapsietan,

jabetza ekonomikoaren onurak!

Eta rimmel-hitzak eskura

gure irudiaren apaintzaile.

 

Iritziak emateko larderia

munduari inposatu diogun

kondena nagusia.

 

Injustiziaren alde onean

erori denaren zorteaz

gozatzen dugun bitartean.