PRENTSA-OHARRA

Galdetzen badidazu

etsairik ba ote dudan,

nik esango dizut ezetz.

Harrituko zara, noski.

Ezagunak dituzu

piztu ditudan polemikak,

erantzun mingotsak,

eraso pertsonalak.

Ibili zara interneten begira,

zenbat irain eta zantarkeria!

Badakit, ez nauzu internet gehiago

ez begiratzea erabaki zuen

ego atrofiatuaren jabe.

Halere, nik, etsairik ez dut.

Eta ez da Buda bihurtu naizelako

yoga eginez baraurik emandako

asteburu luze batean.

Etsaigoaren nire zatiari

uko egin diodalako baizik.

Bi ez dira etsaitzen

batek nahi ez badu.

Eta goibeltzen du

gorrotatzailearen grina,

bizigarri zitzaiona.

Zeinen tristea

alde bakarreko gorrotoa!

Alde bakarreko amodioa

baino gehiago,

honetan ilusioa baitago bederen,

hartan, aldiz, etsipena.

Nahi eta ezina.

Zein kamutsa bestearengan

erantzunik ere

sutzen ez duen gorrotoa!

Galdetzen badidazu

argi esango dizut behingoz:

Etsairik ez izatea

erabaki dudala,

etsaitzat naukatenen

ardurarik nire gain

ez hartzea.