Urari ostutako poemak
Urari ostutako poemak
2014, poesia
104 orrialde
978-84-92468-59-1
azala: Oihana Leunda
Pako Aristi
1963, Urrestilla
 
2016, poesia
2003, poesia
2001, poesia
 

 

HILTZAILEA

 

Ezagutu dut

hiltzailea nire baitan.

Labanari heltzen zion eskuaren indarra

ezagutu dut,

eta kolpea aurrera botatzen ikusi.

Ezagutu ditut

burdina zorrotzak

sabela zulatzerakoan

eragiten dituen

askatasunezko hotzikarak.

Zer nolako indarra sentitzen den

begiak lausotu zaizkionaren osotasuna

birrintzen ikusten duzunean,

giharrik gabe geratu diren arropak

lurrean odoltzen doazen bitartean

sentitzen den euforia eroa.

Ezagutu dut

heriotza etortzen ikusi ez duenaren

begi hanpatuetan

agertzen den ezereza.

Ezagutu ditut

hiltzeko aukera guztiak,

eta haietatik iheska ibiltzea da nire bakea.

Horregatik, maite, ez iezadazu

hiltzaile bihurtzeko eskatu;

ez nazazu probokatu,

ezingo nizuke eta

ezetzik esan.