EMILE GRIFFITH-EN BI OINAZEAK

Emile Alphonse Griffithek

24 urte dauzka 1962an,

galtza ilunak daramatza

eta 68 kilo eman ditu baskulan.

Bere aurrean Benny Kid Paret,

galtza zuriekin,

welter pisuko txapelduna.

«Marikoia!» deitu dio Griffithi

—aurrez jokatu dituzten

bi borrokaldietan bezala—

trufa eta txantxa artean.

Lau egun barru

Madison Square Gardeneko

lapikoan, izerdi irakinetan,

Griffithek konorterik gabe

utziko du Kid Paret

hamabigarren asaltoan.

Txokoan, soka eta ukabilen

artean hesitua,

29 zartadarekin

txikituko dio aurpegia,

kolpe zuzenak, gantxoak,

crochetak arnasaren gibelera.

Kid Paret ez da gehiago esnatuko.

Hamar egun barru

hilko da ospitalean,

Griffithen biografiako

zoritxar nagusia bihurtuz.

Ruby Goldstein arbitroak

izututa

ez du borrokaldi gehiago zuzenduko.

Griffith hotelean ezkutatuko da,

jendeak listua jaurtitzen dio

aurpegira kalean:

batzuek gizon bat hil duelako,

besteek gizonekin oheratzen delako.

Heterosexuala da, bisexuala, gaya.

«Emakumeak gustatzen zaizkit,

gizonak ere bai,

ez dakit zer naizen»,

adieraziko du Sports Illustrated-en,

«berdin maite ditut

emakumeak eta gizonak».

Zahartu zenean, burua galdu aurretik,

gogoeta egin zuen

liburu baterako,

zein arraroa den guztia esanez:

«Gizon bat hil nuen

eta jende gehienak ulertu zuen,

barkatu zidaten.

Gizon bat maitatzen nuenean

zigortu egiten ninduten,

bekatari nintzen,

gizonzale galdua».

75 urterekin hil da Emile Alphonse Griffith.

Ez zuten inoiz espetxean sartu,

baina bizitza osoa

preso sentitu zela

adierazi zuen.

Maitatzea izan zen haren kondena.