sumendiaren ertzera hurbiltzen gara

eskutik helduta zortzi begi dituen

itzal hezurdura poema honen barnetik

kraterraren hegalean likenak eta goroldioa

nola hazten diren entzun dezakegu

lurrazal berdea arroka-odolez

bustita tximeleta bat itzalitako galdaran

hegan egiten

eta gure azeri-gorputza gure

zortzi begi zortzi eskuak

sumendiaren bihotzera lanbrora

erortzen dira salto egiten dute

uretara hegaldatzen dira

gorbela gure hanka biluzietatik igotzen

eta aintziraren hondoan

kandela bat pizten dugu

eskutik helduta begiak itxita

uraren azpian ezkutatzen diren

igarobideak argitzeko beste aintzira

beste sumendi mundu batera

ihes egin ahal izateko