Ametsak ere zain
Ametsak ere zain
2015, poesia
104 orrialde
978-84-92468-70-6
azala: Vladimir Burliuk
Mikel Antza
1961, Donostia
 
2012, nobela
2010, nobela
1987, ipuinak
1985, antzerkia
1985, ipuinak
Ametsak ere zain
2015, poesia
104 orrialde
978-84-92468-70-6
aurkibidea
 

 

INTRO

 

 

hau al da egin behar dudana?

poemak idatzi

alde batera utziz

    asteko bileraren prestaketarako

          datuak biltzea:

              azken errepide-istripuaren

              jipoitu berri duten kidearen

              gose-greban dauden kideen

 

izadi hil honi begira

ez dakit

hartzen ote nauen etsiak

edo zuenganako gorrotoak

nahasten zaizkit

larruak koloreak ideiak sentimenduak

izenik ez dutenak

ispilurik gabeko basamortu honetan

badakit

isildu behar nuke

mihia larrua bezain gris

ontasunaren bila abiatzeko

nekatuegi zafratuegi

badakit

ez nituzke halakoak

pentsatu esan idatzi behar

milesker esan behar nieke

nire zaurietako zornean ozpina botatzen diharduten

munduko zaindarien mirabeei

milesker esan behar nizueke

zeuen eguneroko hitsaren izerdi eta malkoekin

gure kondenaren kate uherrei distira ateratzeagatik

milesker esan eta barkatu kristauki

baina ez da hori

on izan nahi dut

larru gris hau erantzi

pentsamendu gordin krudel hauek

beratzen ipini gure erreketako ur gardenetan

baldin eta ez badituzue denak zikindu

badakit bai

maite zaituztet eta barkatu eta milesker

milesker esan behar nuke

maitatzen ikasi berri dudan

izadiaren hiltzaileak zareten arren

barkatu esan behar nuke

bitan erdibitu nauen aiztoaren ahoak

ezkutukoenean kolpatzean

belarriak mindu dizkizuen garrasia egiteagatik

maite zaituztet esan behar nuke

txistu jo diguzuen arren

baina zuek ez dakizue

etxekalte

ez dela taberna baten izena

ez eraikuntza enpresa batena

atera egidak beste whiski bat

eta jo nazak berriro Tomax

 

hau al da egin behar dudana?

poemak idatzi

alde batera utziz

    atzoko jipoia salatzeko

          hizki tipiko inork irakurriko ez duen

          gutunaren idazketa nekeza?

 

likits hatzetan erretxin

betazalak makar itsatsi

mihia bi halako lodi

ahoa hareaz bete zait

eta ezin

naiz

nire buruari ezarri diodan

kondena honetatik aska

ezin zaituztet benetan maita

ezin zaituztet benetan barka

ezin zaituztet benetan esker

irri makur bat dagite nire ezpainek

amesgaiztoa nahi nuke

gaur goizean ere

zaindariak esan dit bonjour

arratsaldean berriro bonjour

eta iluntzean bonsoir

baina nik

zure ahotik

entzun nahi nuke

egunon!

arratsaldeon!

gabon!

eta gero sarraila itxi du

eta ondoren itxi ditu olioztatutako morroiloak

eta azkenik leihora begira jarri naiz

burdinazko barrak sarea txarrantxa

sarea sarea sarea sarea

zerua ebatsi digute

gure ametsak arrantzatzeko

burdinazko barrak sarea txarrantxa

sarea sarea sarea sarea

ohe ertzera nire oinetara

doi-doi iristen den printza

ez da jada eguzkiarena

ni

gizaki

ez naizen bezala

(haragi gordina usteltzeko

asmatu duzuen

porlanezko kutxa honen

barruan 10 urtez)

ez eguzkiarena da printza margul hori

ez ilargiarena ez izarrena

zaindariak ekarritako gutun bahitu

berantetsiaren barrutik ateratzen den

lurrina

zurea

ez den bezala

urka-bilurra prestatzen diharduten

eskuok

nireak

ez diren bezala

hatsik eta malkorik gabe

burdinazko barretatik

zintzilik dagoen haragi puska

desarmatua eta desarimatua

ni

ez naizen bezala

 

hau al da egin behar dudana?

poemak idatzi

alde batera utziz

    ikustaldi ostean

          biluzarazteagatik

          ikustaldia laburtu izanagatik

              protesta-ekimenaren prestaketa?

 

euria ari du hor kanpoan

ur azpian gizakiak bezala arrainak lurrean

itotzen naiz blup blup blup

nire gorputza ferekatzen dut zure eskuekin

nire burua musukatzen dut ahal dudaneraino

eta ez da aski

esofagoa zitroin estutzen dut ezin kraskatuz

hiru metroko kablea neureganatu dut isilean

kanpaiarena egiteko

euria ari du leihoetatik

euria ari du atera ezin ditugun eskuetatik

urrun

pourquoi il y a des barreaux aux fenêtres?

galdetzen didazu

behialako haurrek pourquoi il pleut?

galdetzen zuten xalotasun beraz

poetak hormak euriz bustiak ikusita

pourquoi pleurent les murs?

galdetuko lukeen asmamen xalo beraz

eta nik

eskegita

panpina mutu

nahiago dut ez erantzun

edo azken hatsean

poetaren kaskezurraren hobe beharrez

fenomeno konplexuegia dela erantzun

adio

 

hau al da egin behar dudana?

poemak idatzi

alde batera utziz

    azken borrokaldiaren balorazio txostena?

          huts egingo duen hurrengo ihesaldi

              planerako prestaketa lanak?

 

gaueko zaintza foku argitan

neure buruaren jiran

Emily Dickinsonen armiarma naiz

hutsetik hutsera

barrote osteko sarean

Perlazko Hariarekin ehundutako sarean

dantza leunean ibili naiz bakardadearekin

egunsentiak zerrenda ubel laranjez

bete zeruertzaren liluraz

sei barroteen atzeko sare karratuan

egindako korapilotik dilindan

amaraun hutsa begietan

izar hotsa belarrietan

ahotsik ez da

ahotsik ez da

bakarrik ageri da nire burua

umezurtz leihoko islan

umezurtz leihoko islan

 

hau ote zen egin behar nuena?