[Goizak zilar ditun igarotzen]

Goizak zilar ditun igarotzen

eta mortu. Hire begiak halatsu

zabaltzen zitunan behinola. Goiza

emaro joaten zunan, argi geldizko

zurrunbiloaren pare. Isilik.

Isilik hintzen hi, bizirik; gauzak

hire begipean bizi zitunan

(ez penarik ez sukarrik ez itzalik)

goizaldeko itsasoaren antzera, zilar.

Hi non, argi, han goiza.

Bizitza eta gauzak hintzena, hi.

Hiregan arnasten geninan, erne,

oraindik ere gugan den zerupean.

Ez penarik ez sukarrik orduan,

ez egun jendetsu eta ezberdinaren

itzal astun hau ere. Oi, argitasun,

urruneko ostarte, arnasaldi

larri, guregan ditun itzultzen

begi geldiak eta zilarrak.

Iluna dun hire begien

argitasunik gabe igarotzen den goiza.