PLANTO ETA AMORE (I)

Kanpo-bultzaden inertzietan zara bizi?

Norbere egarri-gosez hurrup, edan edo klik,

ala zure ez den indar bati men eginik

bihurtu zara zentrifugazio luizi?

Pentsatu trakzioa zurea den, lehenbizi:

aldare arrotz bati egin diozu zinik?

Bultzada barne-bulkada ez dela jakinik,

planto eta amore, bilatzeari utzi?

Garaien izpirituak ordezkatu dizun odol

korrientea darabilzu zainetan barruan,

ala, ekintza, nahi intimoetatik dator?

Ez besterendu erantzukizuna patuan:

noiz zinen, zu, destinoaren lemazain gotor,

bilakatu txotxongilo bere eskularruan?