ITZAL BILDUMA

Bildumako lehena, atearen pendiza:

objektu baten bikoizketaren beldur apala

bistatzen zitzaigun ohetik, lokartu ahala,

etxeko zorura amiltzen diagonal gisa.

Gero, zuhaitzenak: ez baita berdin geriza,

izanik kaxkoan pinua edo makala;

neguan ihesi gindoazkion itzala

maite dugu udan; gerizpe bikoitz da brisa.

Itzal handiko pertsonak hartzen ditu huntzak;

nirerik ba ote dudan, zalantza kabala,

Faustok itzalekin gainezka dauzkanez funtsak.

Itzala beti isil; gurea da astrapala.

Zer duzu maiteago, mundua bera ala

argia piztean desagertzen diren gauzak?