Gurasoei,

Mikeli

PERTSONAIAK

Joxerra Agirre

        Euskara irakaslea. Endika Lakart laguna atxilotu zutenean Guardia Zibila bila ibili zitzaion. Elurraren izaera epikoa azaldu nahian idatzitako poema liburuaren ondoren bere horretan utzi zituen literaturarekikoak mitogintzan aritzeko joera bizitzara ekarriz.

        Andregai baten bila ibili zen, aspaldi ezagutu neska amerikarra gogoan, beharbada. Andregairik ezean txakur bat erosi zuen: Capone, gizakiok eman ez geniona emanen ziolakoan. Harrigarria da datorkionaren aurrean duen serenitatea.

Debra Woolf

        Estatubatuarra. Montgomery-n (Alabama) jaioa. Sanferminetara etorri zen. Hauek bukatutakoan Donostian, Hondarribian, Baionan ibili zen, Sanfermin ondoren hainbat atzerritarrek egiten duten moduan. Doktoretza tesi bat idatzi zuen Hemingway-ren gainean.

Thomas Woolf

        Debra Woolfen anaia. Debrak, hiesaz hil aurretik, Joxerra Agirre aurkitzeko eta gutun bat entregatzeko lana jarri zion. Aurkituko du Joxerra Agirre, baina berandu.

Josema Irutagoien

        Itzultzailea. Urte luzez EEBBetan bizi izandakoa, baita Berlinen ere bolada batez. Berlinen zela ezagutu zuen Alicia, emaztea izanen zuena. Iru­ea inguruan paratu ziren bizitzen, harik eta Josemak bere homosexualitatea aitortu eta banandu ziren arte. Aurrera autogorrotoaren eta bere buruarekiko penaren artean bizi izan da.

Txema Kortes

        Langabetua. EHGAMeko kidea izan zen. Iru­eko Takonera parkean asko ibiltzen zen, oso argi dauzka, sufritu egin dituelakoz beharbada, sexu aukeraketa eta boterea lotzen dituzten harremanak.

Nikasia Urruti

        Hirurogeita hamabi urterekin hil zen bizitza osoa nobio alemaniar baten esperoan egon ondoren. Herriko zenbait jendek duda egiten zuten nobio hura izan bazenik ere. Anjelines Berasategiri Mikel Urruti senarra (eta Nikasia Urrutiren iloba) hil zitzaionean asko kontsolatu zuen Nikasia Urrutik, orduak egiten zituzten elkarrekin paseatzen. Nikasia Urruti hil zenean zentzatu egin zen ordura arte nahikoa nahasirik zebilen Anjelines Berasategi.

Martin Mann

        Laurogei urterekin hil zen Berlinen. Alemaniako Alderdi Komunistako partaide izateak jarri zizkion atzetik Hitlerren atzaparrak. Horietatik ihesi ailegatu zen Euskal Herrira. Hemen zebilela Nikasia Urruti aurkitu zuen, eta halako harreman bat edo izan zuten. Guda amaitu zenean Berlinera itzuli eta ezkondu egin zen. Ez dauka seme-alabarik.

Maddi Susaeta

        Sorgina, emagina, kontseilaria, ukendugilea eta beste zenbait gauza. Etorkizuna makurtu egiten da bere aurrean.

Joxemiel Erreparatz

        Igeltseroa. Botereari beti kontra egiten dioten horietakoa bada ere, azken honetan aberri galduen bila dabil. Aurkitu nahian-edo tresna zaharren bilduma egiten hasi da.

Capone

        Joxerra Agirreren txakurra. Arrazaz artzakurra. Begi zorrotza du gizakion neke eta mixeriak aztertzeko. Ederki bizi zen Joxerra Agirrerekin harik eta...

        Hortik aurrerakoa kale-zakur baten desolazioa baino ez da. Nemesio Lakartek jaso zuen etxean.

Lukas Oihenart

        Trokelean aritzen zen eta trokelean aritzen da. Isiltasunera ailegatu nahi luke, jadanik esateko ezer ez daukanaren lasaitasunez. Ez du batere oroiminik atzera begiratzerakoan.

Ana Yoldi

        Tabernaria. Bizitzako gauzarik handiena amodioa dela irakatsi zioten; horretan bizi izan da, nahiz eta amodioak huts egin behin baino gehiagotan. Banandu egin zen senarrarengandik, Andres Basterrarengandik, eta iraganak ditu desamodioaren gorroto-bideak, eta prest da berriz ere amodioaren gudetan arakatzeko. Gero eta ohartuago dago beste batengana goazenean garraiatzen dugun zamaz. Anne Sexton poeta amerikarrarekin ikasi du, eta bizitzak eman zaflakoekin.

Andres Basterra

        Ana Yoldirengandik banandutakoan joan zen Kubara iraganik gabeko bizitza bizitzera, iraganak pertsekutatu egiten baitu. Umetan Ana Yoldiren etxean ikusitako eszenak betiko markatu zuen.

Xabier Bizi

        Filosofia irakaslea. Pausatua, gozoa, lasaia. Gaztetan tristurak eta ilunpeek tentatu zuten; egun, ordea, alegrantziaren apustua egiten saiatzen da, nahiz eta horretarako berebiziko indarrak behar izan. Susmagarria da zeinen entzule ona den; bizitza mailegutan bizi duelakoz ote? Besteren bizitzak bizi dituelakoz?

Anjelines Berasategi

        Etxandrea. Mikel Urruti senarra hil zitzaionetik kamisoi bizimodua egitea erabaki zuen. Mina balizko hipotesia baino ez den munduan bizi nahi du, mina behin pairatzearekin nahikoa izaten delakoz. Minari zentzua emateko patu bat oparituko diote baina, hasieran, ez du onartuko. Objektuen mundu epelean bizitzea aukeratuko du, baina, azkenean, onartu eginen du oparitutako patua.

Nemesio Lakart

        Endika Lakarten aita. Andrea aspaldi hil zitzaion eta semea etxetik eraman zutenetik arima herratu bat bezala ibiltzen da. Belaunaldiko gehienak hil zitzaizkion, eta esperoan baino ez da bizi.

Lwazi Ndubile

        Afrikarra. Jaioterriko guda eta mixeriari ihesi ailegatu zen Euskal Herrira. Zaila egiten zaio, hala ere, desterruan bizitzea; John Berger nobelagile ingelesak esaten duen bezala, katramila bihurtzen baita nork bere burua aurkitzea denbora eta espazioaren ardatzak hautsi direnean.

Endika Lakart

        Nemesioren semea. Kartzelan egon zen eta ihes egin zuen Mikel Urruti (Anjelines Berasategiren senarra) hil zen egun berean. Exilioan bizi da egun hartatik eta bere oraingo izatea gutunetan dago.