Basalarrosek miazkatu dute

baselizaren zurezko arkupea.

Hantxe, harrizko murruaren kontra

amodioa antzeztu genuen aspaldiko arrasti hartan.

Euriak zelaiari erauzten zion busti-hotsa

zeure hatzek atera zioten nire sexuari.

Armiarma-sarean zehar ostadarra ikusten nuen

zuk bultza eta bultza

ezerezaren kontra egiten zenidan bitartean.

Gero, trinki-tranka aldendu ginen errepidean aurrera

gorputzei bihozminaren salda epela zeriela.

Huraxe izan zen atzen enkontruetako bat,

gure azal umelak ordurako bazekielarik

elkarrentzat ez ginela.