Mi padre me llevaba a casa,

los lobos aullaban al cielo.

Amorante

 

 

Dardara egiten duen zura

 

zura hara danda hura

 

herriko etxe guztietako jendea

 

hurbilduko da eliza atarira

 

hurbilduko da azken agurrera

 

hurbilduko da hurbil ezinera

 

hurbilduko da

 

intziria zeru labarra

 

abereen marrumak

 

ordura arte arindu gabeko joareak

 

libratu gabeko saihets hezurrek

 

puskatu dute

 

beldurtu dute

 

dardararaziko dute

 

amaren soinekoaren gibelean

 

kokatutako eta ezkutatutako

 

begi-hemisferioaren pertzepzioa

 

aita zeruan dela seme

 

aita zeruan lasaitu hadi

 

semea baina zerura so zerua su

 

zerua eskolako margo

 

zerua bortz hatzetako ikusmin

 

zerua eskuineko begia hertsarazten dion argi-zuzi

 

amatxik kulunkatzen zuen txondorra

 

mazela musugorriaren eguzki irribarretsua

 

zeruan hodeiak hur

 

basoko animalia beldurtuek

 

ez dute asfaltoaren gainetik

 

herriak hesitu mugarik zeharkatuko

 

gaurik hertsienean letaginik erakutsiko

 

uluka agurtuko dute basomutilaren

 

zaulitasunaren babesa

 

hitz eta keinurik gabekoa

 

aita zeruan dela seme

 

non zein tokitan ama

 

ez dut inon ikusten

 

ez dut bere hatsa sentitzen

 

nora joan da zergatik utzi gaitu bakarrik

 

semea eskutik hartu eta berarekin eramanen du

 

otsoen artera

 

lur erreka eta zuhaitz arteko aienera

 

herriko amenazuetarik

 

libro

 

eta seguru mantenduko dituen

 

urtaroen erritualekin nahastera

 

su lur haize itsaso zerumugan

 

zabal izatera