Ispilua

Erraza da maiteko zaituen gizon bat eskuratzea;

besterik gabe, izan zintzoa emakume gisa dituzun

desiretan. Egon ispiluaren aurrean biluzik haren alboan,

bere burua indartsuen ikusi eta halaxe

dela sinets dezan, eta zu askoz leunagoa,

gazteagoa, ederragoa zarela… Onartu zure

miresmena. Hauteman haren lohadarren

perfekzioa, haren begiak gorrituz dutxapean,

haren ibili herabea komuneko zoruan, eskuoihalak

jaurtiz, eta txiza zarra-zarra egiteko duen era.

Ar eta zure gizon bakar egiten duten

xehetasun samur guztiak. Oparitu egiozu

guztia; oparitu emakume egiten zaituena:

ile luzearen lurrina, bularren arteko izerdiaren

musketa, hilekoaren odolaren zarrasta beroa,

eta zure emakume gose amaigabe guztiak. O bai!

Erraza da maiteko zaituen gizon bat eskuratzea,

baina agian aurre egin beharko zaio

gero hura gabe bizitzeari. Bizitzarik gabe

bizitze bat hara eta hona mugitzen zarenean,

ezezagunekin topo eginez; zure begiek

bilatzeari utzi baitiote; zure belarriek

haren azken ahotsa soilik entzuten baitute

zuri deika, eta zure gorputzari, zeina lehen,

haren ukituekin, dirdaitsua baitzen nola

letoi distirarazia, eta orain itzalia eta behartsua.