Ahotsak besterik ez du irauten

 

Zergatik isildu behar nuke?

Txoriak itsasertz urdinaren bila hegaldatu ziren.

Zerumuga bertikala da, zerumuga bertikala da

eta mugimendua ur-turrusta baten antzekoa

eta planeta argitsuak biraka dabiltza

gure ikusmen eremuan.

Lurra ugaritu egiten da goienetan

eta aire-putzuak lotune bihurtzen dira

eta paperezko zizareen garunak

atzeman ezin duen hedadura da eguna.

 

Zergatik isildu behar nuke?

Bidea bizitzako itsasontzien artetik doa.

Ilargiaren umetokiaren zoruak

zelula kutsatuak hilko ditu

eta eguna urratu osteko espazio kimikoan

ahotsak besterik ez du iraungo!

Denboraren partikulek

xurgatu egingo dute ahotsa.

Zergatik isildu behar nuke?

 

Zer ote da zingira bat,

gainbeheraren zomorroen haztegia ez bada?

Gorputegiko gogoetak

hildakoen buru puztuetatik irten ohi dira.

Koldarrak ilunean ezkutatzen du koldarkeria

eta labezomorroak… a!

Labezomorroek ere hitz egiten badute,

zergatik isildu behar nuke nik?

 

Berunezko letren elkarlanak ez du ezertarako balio.

Berunezko letren elkarlanak ez du

pentsaera erdipurdikoa salbatuko.

Ni zuhaitzen leinukoa naiz,

aire ustela arnastean gaixotu egiten naiz

eta hiltzear zegoen txoriak aholkatu zidan

gogoratzeko hegadaz.

 

Indar guztien xedea

eguzkiaren oinarri argira batzea da

eta argiaren adimenean sartzea.

Jakina, haize-errotak usteldu egiten dira.

Zergatik isildu behar nuke?

Nik galburu berdeak eradoskitzen ditut bularrekin.

 

Ahotsa, ahotsa, ahotsa besterik ez,

ibili dabilen uraren desira garbiaren ahotsa,

izar-euriaren ahotsa lurraren lorezilera jausten,

umekia eratzen deneko ahotsa

eta maitasunaren espiritu komunaren hedapena.

 

 

Ahotsak, ahotsak, ahotsak besterik ez du irauten.

 

Ipotxen lurraldean, neurketa-irizpidea

zero graduaren paraleloan dabil.

Zergatik isildu behar nuke?

Ni lau elementuen esanekoa naiz,

eta nire bihotzeko araudia idaztea

ez da itsuen gobernuaren zeregina.

 

Zer axola niri animalien marru ekina

haragiz batzen direnean?

Zer axola niri zizarearen higidura ezdeusa

okelaren zuloan?

Loreen leinukide izateak engaiatu nau bizitzarekin.

loreen leinukide izateak. Ba al dakizue zer den hori?