Ortzadarra da orain hiriaren koroa erraldoia:

egunak hil egiten dira dinosauro zaharrak bezala.

Antxetek ibaiaren ispiluan beren estrain letrak idazten

dituzte kolorezko klarionez: «Laster etorriko zaigu itsasoa

zenbait mesederen ordaina eskatzera».

Eta irri egiten dute pasealekuko platanondo orbainduek

ezohiko ikuskizunaren aurrean, enborrak tolestu bitarte.

Txuria da hiria argi islaren azpian: irina.

Aipatu egiten dute isiltasuna loteria-saltzaile itsuek

oro lurrikara antzu edo eraikuntza baldar balitz bezala.

Usoek lau haizeetara zabaltzen dute gure oinazea

tabernari goibelen eskuetara kuartilak banatuz.

Baina ate guzti horien atzean ez dago lekurik betiko

karabana erratuarentzat. Horregatik asesinatzen ditugu

elizaurreko usoak ogi apurrak emanez.

w1989