Egurra sutondoan:

Hor egote hutsarekin

berotzen du

Sehaska kantaren

oihartzun amaigabea

gure amaren hilobian

Kukua

denbora bikoizten ari da,

bihotza bezala

Noiz egingo ote du elurra,

berriro

nire herria ikusteko

Bi kuku

erdibana

kantuan

Une honetan norbaiti

artatxori hegaldi bat

bururatuko zaio

Haur batek harria jarri du

belaze erdian:

belar kontzentrikoa

Iluntasuna lurrun beltza da

eta egun-argiz

lurpeko leizeetan ezkutatzen da

Eztul bat:

isiltasunak

behaztopa egin du

Gauak

itsasoa hustu du

inork sumatu gabe