—137—

JON MIRANDEri

Parisera

Guatemala, 1954-IX-28

        Adiskide txit maitea:

        Neurriz gaindi luzatu dut zuri erantzutea oraindik ere Eire orritsuan (pherde- emen ikasi dut itz polit au) kokaturik zeundelakoan. Onuzkero or zaitut, Parisko egurats gardena etxeko zurubi begiko artatik [...]biriak betean ats-artuz. Jakingarrienik izanen da Jon, gure aldizkarirako, Eiren ikusi eta ikasi dituzunetaz artikuluren bat, izkera-auziari buruz batez ere. Ez ote zenuke zerbait idatziko, luze ta sakon? Zuk bezin ondo, nihork ere ez luke egiteko ori beteko.

        «Ortziren Zaldunen Gudu-kanta» benetan zoragarria. Eztitan irakurri eta kantatu ere dut. Aizkora zorrotzez landu duzula ageri du; itzez ta ahapaldiz ezin obeto taiutua. Min dut gure aldizkaria ez argitara[...]. Zaitegiri ere eman nion irakurtzeko, apaizak ordea, naizta zabalak izan, beti ditute bere irizpide bereziak. Etzidan deus esan.

        Oraintxe argitara dugu aurtengo bigarren zenbakia; joan zaizu [..]resirat, baita lenengoa ere. Bigarren onek mearrago dirudi, ala ere besteak bezin lan ugari ditu: oraingo ontan elatz tipia erabili dugu eta orregatik ematen du lenengoak baino exkaxago. Irugarrena ere sartu [...] irarkolan; an imprimatuko dugu zure «Zinopha» baita «Eros-en kantatxoa» ere. Aitzina jarraitzekotan gabiltza, ez jakin ordea Prankoren almena ez ote zaigun tartetuko gure lana itotzeko. Aren ordezkaria, ain zuzen egun elduko da uri ontara.

        Zertan da Krutwig jauna? Kaukasoko auziaz zebilela zerbait idazten zure lenagoko baten erran zenidan. Oso urri gabiltza jakintza lanetaz, eta zuek oldartzen ezpazerate bide ortatik, ez dakit inor ausartuko danik ere. Nik asmo aundiak ditut, bainan lanez itota nabilkizu, ezertarako asti gabe. Oraintxe asiko ditugu emen urteko oporraldiak, bainan zai daukat nere Euskal-literaturaren edestia. Aurten bukatu nai nuke.

        Villasante Aitak zenbait idazlan jakingarri igorri dizkit. Ukan ditut Koldo Mitxelenaren berriak ere. Jakina, Etxanizek sarri idazten dit eta zuk ezagun dituzun bere bi azkeneko olerki ere biali dizkit «Katalin « eta «Argatik». Benetan arrigarria apaiz orren jarioa itz-neurtuetarako. Igaz saritu genitun olerkiak liburutxo batean irarrita aterako ditugu gabonak baino len. Ala uste dugu, bainan emengo irarlariek burua eragiten didate, tautik ere euskeraz ezpaidakite. A zer nolako burrukak ditudan utsik gabe aldizkaria ateratzeko. Zuek ezin dezakezute ortik amestu ere! Azkenean etsi bear, bestela paper orrek ez luke argirik ikusiko nihoiz ere.

        Bukatzera noakizu, urrengo batean luzezago idaztekotan, goi-arnasak laguntzen balin badit. Goraintzi adiskideei eta guraso maiteei batez ere. Har ezazu lagun onen besarka estu bat.