ZER GALDU ZAIZU

itxaropena jausi zaizu eskuetatik

eraikin bat erortzea lakoa izan da

eta zure garrasiek mundua pitzatu dute

zer izango ote da

bularraldea erdibitzen dizun zulo hori

zure larritasunean ikusten den amildegia

heldulekuak erauzi dizkizute begietako luiziek

nabari da ez duzula zeri atxiki ez duzula babesik

zenbat bero gorde diezazukete leiho apurtuek

iruditzen zait gaitz guztiak sufritzea

baino are latzagoa izango dela

etengabeko zure itotze hau bizitzea