Tarta erraldoiaren atzean jarri duten

haurtxoak bere lehen urtea bete du.

Eritxo erakusleaz gozokitzarra ukitu eta

erantsita geratu zaion pusketari

zientifikoki behatu ondoren

ahora eraman du benazko, zeremoniatsu.

Jaizu jan potxolotxo gurea, diotsote

inguruko hainbat aho itxuragabeek, eta

kantu artean opariak ireki ahala

haurraren begi handiak handiagotuz doaz,

harik eta bat-batean oparion

bildukinetako bat hartu duen arte,

aulkitik jaitsi eta dingilin-dangalan

kalerantz abiatu da pozarren,

paper koloretsua astintzen.