UNIBERTSITATE MUTILAK

Zuen lumatik ez da gezurrik aterako,

diotsue fakultatera joan zaizuen hizlari famatuak,

egia bat esateagatik ile bat galduko baduzue ere,

eta irribarre bat itzuri zaio ezpain ertzetik

zuen eskuliburuak ikustean, eta

zuen galdera tolesgabeak entzutean

eskarmentuak zailduko ditik, pentsatu du.

Izan ere, bide luzea duzue ibilkizun.

Egia defendatzeko ahotsa findu beharko duzue,

egia gordinegia baita sarritan. Urguritasunez

esan behar da, haragi kolpatuaren ubela

zuritzeraino. Bide luze sakrifizioz betea, baina

zuetako hoberenek atzemanen duzue

ongiaren eta gaizkiaren arteko harresiaren

jagoleen distira. Castratoaren distira.

Orduan hitzaldiak eginen dituzue

unibertsitate mutilen aurrean, eta irribarre bat

itzuriko zaizue haien eskuliburuak ikustean,

eta haien galdera tolesgabeak entzutean

eskarmentuak zailduko ditik, pentsatuko duzue.

Egia bat esateagatik ile bat galduko duzue, baina

zuen lumatik ez da gezurrik aterako.