«Probidentzia izan da», entzun izan dut maiz

zorioneko gertakariren baten ostean.

Halabeharrari egozten zaio

zorigaitz bat jazo izana, eta esaterako

norbait ustekabean hil eta gero

«patua zuen» esan ohi da. Bai eta asmatu ere.

Izarren eragin erabakigarriaz

duda arrastorik geratzen ez den honetan,

nitaz den bezainbatean, ondo asko dakit

ez naizena irabazteko jaioa (ez eta iaioa),

eta irabazle, jakina, jaio egin behar da.

Biluzik bezain krudel ageri zait patua,

halarik ere neure etsian

ez dut esperantzarik galdu, azken batean

patua iraganeko kontua baita.